Útstæð eyru
Þó þetta ástand sé af því tagi að erfitt sé fyrir fullorðna að samsama sig því að þetta geti verið stórt vandamál, eru yfirleitt börn sem líta svo út, alls ekki sammála. Útstæð eyru geta verið orsök rætinnar stríðni eða eineltis í skólum. Best er að leita lýtaskurðlæknis um leið og barnið nefnir þessar áhyggjur sínar. Þetta er yfirleitt á aldrinum 10 - 13 ára, fyrir þann tíma gera þau sér ekki grein fyrir þessu, og skólafélagar ekki heldur.
Um er að ræða fremur litla aðgerð, sem getur breytt lífi barnsins.
Þessi aðgerð er hins vegar að verða algengari hjá fullorðnum einnig, á öllum aldri.
Otoplasty...
...er aðgerðin kölluð á ensku. Þetta er skurðaðgerð sem framkvæmd er til að laga meðfædda galla á eyrum, til að bæta útlit þeirra, sem teljast vera útstæð samkvæmt áliti sjúklingsins. Þetta eru einkum börn, sem orðið hafa fyrir stríðni eða athugasemdum vegna útlitsins. Í flestum tilfellum er útlitið meðfætt, og oft má sjá að annað foreldrið hefur sama útlit, hafi það ekki verið leiðrétt. Hinn möguleikinn er sá að ástandið hafi komið til eftir meiðsli, þ.e. blóðsöfnun kringum brjósk eyrans.
Það sem er algengast er að brjóskið í ysta hluta eyrans (fjærst höfuðkúpunni) er beygt framávið, í staðinn fyrir að vera aftur. Oftast er það svo að þeir hlutar eyrans sem eru næst höfuðkúpunni eru eðlilegir og ekki þarf að eiga neitt við þá. Til að fá eyrað eðlilegt í útliti þarf að taka fram allt brjóskið sem er beygt á rangan hátt og meðhöndla það svo að það brettist inn, í staðinn fyrir út. Til að gera þetta er brjóskið yfirleitt slípað með raspi eða trissu, ellegar skorið í það á sérstakan hátt með skurðhníf.
Í aðgerðinni leggur lýtaskurðlæknirinn skurð á bak við eyrað og annað hvort minnkar, eða endurmótar brjóskið til að breyta stærð, lögun og fá eyrað til að sitja nær sjálfu höfðinu.
Hægt er að gera þessar aðgerðir í staðdeyfingu með róandi lyfjum, sérstaklega hjá fullorðnum. Ef um börn er að ræða er yfirleitt best að framkvæma aðgerðina í svæfingu. , ástundum með róandi lyfjum. Einstaklingurinn getur farið heim innan fárra tíma eftir aðgerð.
​
Eins og með allar skurðaðgerðir fylgir otoplasty alltaf ákveðin áhætta. Þessi áhætta er sú sama og með allar aðrar skurðaðgerðir. Helstu fylgikvilla má sjá hér