Skurðir þínir eru hárfínir og eru saumaðir í tveimur lögum. Undir húðinni er sterkur þráður sem eyðist, en utaná er saumur með fínum þræði sem þarf að fjarlægja eftir ca. eina viku. Ofan á saumunum er þunnt „skurðlæknateip“ sem einu umbúðirnar. Teipið á að liggja ósnert þar til þú kemur í eftirlit.

Teipið þolir vatn, svo á þriðja degi skaltu fara í sturtu eftir að hafa fjarlægt umbúðapúðann (ytri umbúðirnar). Góð sturta fækkar bakteríum á húðinni og minnkar því líkur á sýkingu. Eftir sturtuna geturðu þurrkað teipið með t.d hárþurrku.

Eðlilegt er að eftir aðgerðina séu eyrnasneplarnir mjög bólgnir og aumir.

Fyrstu vikuna skaltu ekki nota farða eða aðrar snyrtivörur í andlitið, annað en milt rakakrem. Ef þú rakar þig í andlitinu er best að sleppa því fyrstu vikuna. Þegar saumarnir hafa verið fjarlægðir máttu nota allar snyrtivörur á venjulegan hátt.

Eðlilegt er að um þrjár til fjórar vikur taki fyrir mestu bólguna að hverfa, en eyrnasneplarnir geta verið aumir í allt að þrjá mánuði. Á þessu tímabili er eðlilegt að þeir sýnist stærri en þeir verða eftir að bólga og þroti er horfinn. Þetta er því tímabundið ástand.

Sýkingar eftir þessa aðgerð eru afar óalgengar.

Farðu vel með þig vikurnar eftir aðgerð. Forðastu alla líkamlega áreynslu fyrr en liðið hafa um tvær vikur. Þetta á einnig við um alla íþróttaiðkun.

Endurkomutíminn er bókaður eftir ca. viku. Í honum athugum við hvort gróandinn í skurðunum sé eðlilegur og gætum að sýkingareinkennum.